राजनीतिला ताम लोप्पारी घेदुङ साझा ग्ला
मेम्बर लो तामाङ
चोहो, नेपाल तामाङ घेदुङ मकवानपुर

दात्ते नेपाल तामाङ मकवानपुरला गतिविधि तीका तीका मुला -
मेम्बर ः चु हृयुलठीमसभाला चुनाव वीमा ङाच्छा तामाङकादेदा चु हृयुलठीम सभा, हृयुलठीमला महत्वला तामरी नाम्सा नाम्सारी ङानीसे गेताङकादे स्हेङजी । थे लीच्छाला हृयुलठीम स्हेङबा ताङरी हृयाङ तामाङला माग, याङतामकादे सुनिश्चित ताला कि आता बीबा तामकादे जिल्ला थुम थुमरी छलफल लाबा गेताङकादे ङानीसे लाजी । दारेम जा नेपाल तामाङ घेदुङला राष्टिय जोम्ना ङाम ङामरी हाबा ताबासे ङानी नोन् थेलान तयारीरी मुला । चुनोन् ताङरी दात्ते जिल्लाला जोम्ना स्हेङबा तयारी लाबान मुला ।
ह्राङनीेसे जिल्लाला जोम्नाजा हाअीमा स्हेङबागेन मुला -
मेम्बर ः असोज लारी जोम्ना लातोबा बीबा केन्द्रला निर्देशन मुला । असोज ला न्हाङरी ताला ।
ह्राङ चोहो मुला , जोङला - कार्यकालरी तीका लास्युजी । तामाङकादलेला लागीरी -
मेम्बर ः २०६३ चैत १३ हेन्से ङाअी जिम्मा कीन्बा हीन्ना । जोम्नाग्यामसे नोन् । ङाच्छा ह्राङबा ग्योअी, लिपिला तामजे आतानी । दारेम हृयाङसे नोन् सामाजिक गेन्दुन तासाअी नोन् ह्राङला राजनीतिक याङतामकादे कीन्बा तामरी गेताङकादे स्हेङतोलला बीबा केन्द्रला राष्टिय जोम्नासे नीति स्होजी । थेअन्सार ङानीसे नोन् गेताङकादे लाजीबा मुला । सन्जोग जामा दुअीरीन् नेपालरी ग्रेन जनआन्दोलन ताजी । हृयाङ जनआन्दोलन हृयाङला लागीरी याङताम यारी कीन्बा चु ज्याबा अवसर हीन्ना बीबा विश्लेषणला छ्यामरी बेनान आन्दोलनरी प्राजी । ङानीसे नोन् जिल्लाला बेनान गेताङकादे आन्दोलन केन्द्रीत लाजी । ङानी बेनान जनआन्दोलनरी स्यान्दो थेन छ्याम छ्याम प्राजी । आन्दोलन उत्कर्षी दोबा वैशाख लाला च्युअीरी क्यारमी घेदुङसेन हेटौडारी आन्दोलनला नेतृत्व लाबा मुबा । घेदुङला राष्टिय जोम्नासे राष्टिय चेतनाला लागीरी ग्याम ठ्वाङबा गे नोन् लाजी । थेनोन दुअीरी हृयुलरी राजनीतिक परिवर्तन नोन् ताजी । थे ताबासे राजनीतिक गेताङरी ल्हाना व्यस्त ताजी । मकवानपुर जोङरी संयुक्त ताम्सालीङ सङ्र्घष्ा समितिरी नेपाल तामाङ घेदुङला नेतृत्व लाबा अवसर नोन् याङजी । राज्यला पुनःसंरचनाला तामकादेरी तामा ङ हृयुल्बादा गोना लाबा गेनोन् चु नोन् दुअीरी ताजी । थेसे लामा ङाला दान्देदोनाला दुअीरी राजनीतिक रुपरी छोरुवा हाना लाबा गे कादे लाम्याङजी ह्राङ ङादा म्हान्बा मुला ।
आर्कु घेदुङसे दात्तेदोना ल्होछारदा राष्टिय प्रीबाला रुपरीन् विकास लाबा, स्थापित लाबा गे लाबाला मुला । ल्होछारसे पाङगेन बीसाम तामाङ हृयुलला गुङरी गोरगी सांस्कृतिक क्रान्तिन बाबा गे लाजी । केन्द्रसे पाङबा दुअीरी ङाच्छा ङाच्छा ल्होछारला गेताङकादे ल्हाना ह्राङबा जिल्ला सदरमुकामकादेरी जे ताबा मुबा । ङाअी जिल्लाला नेतृत्व कीन्बा दुअीहेन्से जा ल्होछारला गेताङकादे सदरमुकामरी जे आताना नाम्सा नाम्सारी इकाईकादेसे स्हेङतोला बीबा नीति स्होजी । चुराङ लामा दीङदाङसे ल्होछार प्रीबा दाङबा चेतना थोन्ना बीबा ङानीला उद्देश्य हीन्ना । चु ल्होछारला याम्बुरी, केन्द्ररी, सदरमुकामरी जे आताना नाम्सा नाम्सालारी, तामाङजुगुला दीमदीमरी दोना लातोला, बेनान तेन्बा दाङबा प्रीबा स्होतोला बीबा सेम थोसी ङानीसे थे अन्सार नोन् गेताङकादे स्हेङसी हाजीबा मुला ।
बीबा  क्यार्सर्ेेह्राङला गे लाबा दुअीरी जा तामाङकादेरी राजनीतिक रुपरी जे आताना सांस्कृतिक छोरुवा हाना लाबा गेताङकादे ताजीम । आहीन ओम -
मेम्बर ः ओदे जे आहीन । ङानीसे दात्ते ह्राङला धर्म पोबारी वाङबा ल्हानान तामाङकादेदा नोन् थेराङ आलाबारी पाङसी हाबा मुला । तामाङजुगुदा धर्म पोबारी बाध्य तानालाबा गतिविधिकादे नियन्त्रण लाबारी बौर्द्धधर्म तामाङला सांस्कृतिक धर्म हीन्ना, चुसे हृयाङला पहिचान पीन्बा मुला बीसी प्रचार लाजीबा मुला । चुराङ नोन् लासी हृयाङला ल्हानान धार्मिक, सांस्कृतिक गेताङकादेरी मुबा आज्याबा विकृतिकादे ब्याङतोला, बाप आअीराकला चलन ख्लातोला, साअीबा तुप्पा लाबा गेकादे ख्लातोला थेराङ लाजी बीसाम हृयाङला रीमठीम दुअी अन्सार स्होबारी हाम्ला बीबा ताम नोन् लाबा मुला । चु गेरी ङानीसे लामा गुरुजुगुदा जक्की सक्रिय ताबारी म्होअीजेन लाबा मुला । मकवानपुर जोङरी चु २०६७ सालरी हासी ङानीसे जनआन्दोलनला दुअीरी महेन्द्रला शालिक प्लोक्सी ब्याङबा ग्लारी साङ्गेला कु थान्बारी सफल ताबा मुला । घेदुङरी हासी आत्मसन्तुष्टी ताना लाम्याङबा गोरगी गे चुनोन् हीन्ना ।
ह्राङनी घेदुङला गेताङकादे स्हेङबा दुअीरी ग्ला ग्लारी दोमा तामाङकादेदा ह्रुप तामा चु दुअीरी तामाङकादे कादे सक्रिय ताबा स्याप्जी । राजनीतिक याङतामकादे कीन्बाला लागीरी कादे छोर्बा याङस्युजी -
मेम्बर ः तामाङकादे ङाच्छाला ह्राङबा राजनीतिक गतिविधिग्याम थारेङ चीबा, गोबारी आम्हाअीबा अवस्था जा आरे । बेनान जागरुक मुला । कादे सक्रिय मुला कादे दारेम हाराङ ताग्याम तीका ताग्याम बीसी चासो पीन्बा, ह्राङला नाम्सा नाम्सारीक्यार ताम लाबा नोन् स्याप्जी । हीन्बा घेदुङसे लीच्छाला दुअीरी ताम्सालीङला आन्दोलन व्यापक स्होबाला मुला । थेसे लामा गोरगी लहर जा थोन्बा मुला बीबा ङादा म्हान्बा मुला । दात्ते हृयाङसे च्याजी बीसाम बेनान राजनीतिक दलकादेसे तामाङजुगुला लागरी ल्होलोन् भातृ गेन्दुन ठ्वाङबा हृयाङसे म्राङबारी हाम्ला । चुसे लामा तामाङजुगुरी राजनीतिक छोरुवा हाजीन्बा मुला । हीन्बाम घेदुङसे राजनीतिक ताम लाबारी तीबा लीच्छा पार्टर्ीीाङरी मुबा बेनान् कार्यकर्ताजुगु घेदुङरी नीला बीबा लोङबासे लामा नोन् दलकादेसे भातृ गेन्दुन ठ्वाङबा ताबारी हाम्ला । तामाङजुगु ग्लागीरी डीक्सी चीजी बीसाम कोङबा  शक्ति ताला बीबा अनुमान नोन् थेनीसे लाजी ताला म्हान्बा मुला ।
दलकादेसे गोरङी उद्देश्यसे भातृ गेन्दुन ठ्वाङबा हीन्ना बीबारी हाम्ला - गोरगी तामाङजुगु ग्ला गीरी चीसी कोङबा शक्ति स्होबारी आम्याङगाअी बीसी । आर्कु राजनीतिक छोरुवा पीन्बा उद्देश्यसे नोन् ।
मेम्बर ः ङादा थेराङ म्हान्बा मुला । दात्तेदोनाला राजनीतिक दलकादेला अवस्था तीका मुला बीसाम आदिवासी जनजातिकादेसे तेम थुअीसी ह्रो आलादे दोना थेनीसे ह्राङला ग्याम बीबा ह्राङलासी स्होसी ङाच्छा नीबारी हाम्बा अवस्था आरे । चु मकवानपुर जोङरी नोन् ल्हानान रेम तामाङजुगुला भोट कीन्सी, प्रयोग लासी कमल थापासे चुनाव डाजी, लोन्पो दोजी । चुरी ल्हानान दलकादेसे नोन् तील्माला रेकादेरी तामाङकादेदा प्रयोग लाबा मुला । तामाङसे गोला आहाम्नी । तामाङजुगुसे ह्राङ प्रयोग ताजीबा ताम । कमल थापासे जा बीसाम खाली बोरा ग्लुबारी वीमा तामाङला भोट ग्लुबारी सस्तो ताबा मुला बीसी पाङनोन पाङबा मुबा रो । तामाङजुगुसे तील्मा चु ताम आगोसाअी तीन गोजीन्बा मुला । थेराङ ताबासे ह्राङला विरासत व्यान्ना दारेम बीबा ल्होङसी दलकादेसे नोन हाम्दे उपाय लाजीबा मुला । तामाङजुगुदा कमजोर स्होबा बाङ लाजीबा मुला ।

तीकादामा बीसाम चु दुअीरी तामाङकादेदा सेना गोना छोर्ना लाबारी घेदुङसे जा क्लाङतोबा भूमिका कादे क्लाङजी ताला -
मेम्बरः दात्ते तामाङजुगुरी राजनीतिक जागरण बाबारी मी घेदुङला ग्रेन भूमिका मुला । दात्ते दोक्सेवीमा तामाङजुगुदा ग्ला गीरी थान्सी राजनीतिक तामकादे पाङबारी, लोप्पारी सजिलोन् घेदुङदा मुला । घेदुङला गेताङरी सजिलो ताबा मुला । घेदुङला गेताङ बेनान दलला तामाङकादे जोम्बा मुला । चु थे दलला कार्यकार्य बीबा अवस्था आता । तर दलला गेताङरी ह्राङला वीमा स्यान्दो दलला कार्यकर्ताजुगुसे नीसेदा आतानी । कादे दलकादेसे थेरी आनीअु बीसी हृवीप जारी लाबा अवस्था नोन् ताबा मुला । पार्टर्ीी गेताङकादेरी बेनान तामकादे थान्बा ताम आतानी । घेदुङला लागीरी ह्राङला गेताङरी बेनान तामकादे थान्म्याङबा, जातीय चेतना पीन्बा ताम ज्याबा अवसर मुला ।
दात्ते तामाङजुगु ताम्सालीङ स्हेङबा अभियानरी मुला बीसी पाङबा मुला । चुरी ताम्सालीङ स्हेङबारी चुनौतीकादेजा तीका मुला म्हान्बा मुला ह्राङदा -
मेम्बर ः दात्तेदोना हृयाङ तामाङजुगु म्हीला राजनीतिक साधनजे ताजीबा मुला । ताम्सालीङला मागी लाजीबा मुला । न्हाङगार ताम्सालीङ याङबा लीच्छा थेदा हृयाङसे साँच्चिन नेतृत्व लाबारी हाम्बा क्षमता थेन मानसिकता थान्तोजी, पुअीतोजी । आर्कु ताम तीनी हृयाङसे थान्बा ह्राङलासी ताम्सालीङ स्हेङबा अवस्था मुला की आरे - मीन जेला ताम्सालीङ हाजी बीसाम तीका लासेदा - थे लीच्छा हाराङबा आन्देालन स्हेङसेदा - थेला नेतृत्व हाल्से लासेदा - चु जा गोरगी चुनौती मुला । दात्ते ताम्सालीङ पीन्बाम पीन्गे, मीन जेला पीन्गेले बीबा षडयन्त्र ताजीबा मुला । हृयाङसे तेबा आत्मनिर्ण्र्ााा अधिकारला ताम, जातीय स्वशासनला ताम, अग्राधिकारला तामकादेरी टालटुल लाबारी बाङ ताजीबा मुला । दात्तेला तामाङ नेतृत्वसे गोतोबा ताम चु हीन्ना । न्हाङगारी ताम्सालीङबा लीच्छा नोन् छाङमान दलकादेसे चु पार्टर्ीीेन थे पार्टर्ीीाबीना च्याङनारी दीङ च्युअीदोना ताम्सालीङ स्हेङबा गे लातोला । नेतृत्व हालादामा दोसाअी स्यान्दो तामाङसे थेनीदा ह्रो लातोला । हृयाङसे गोरगी सक्षम शासकला परिचय पीन्बारी हाम्तेाला । चुराङ लाबारी हाम्जी बीसाम हृयाङला ताम्सालीङ समृद्ध तासेला मुला ।
थेराङलासी तामाङजुगु न्हाङगार ताम्सालीङरी ग्ला गीरी चीसी, डीक्सी नीबा सम्भावना स्हीबा मुला ह्राङसे -
मेम्बर ः  ङाअी दात्तेदोना म्राङबा आरे । तीकादा म्राङबा आरे बीसाम कादे तामाङकादे तील्मा दरबारला ङामङामरी कोर्बाजुगु मुला । थेनीदा ताम्सालीङरी हाराङबा ग्ला पीन्सेदा - चुराङ नोन् लासी अग्रगामी सोच थोसी हाबा बीसी पाङबा तामाङकादेला गुङरी जा ङाज्याङ मतभेद मुला । ताम डीक्पा आरे । सैद्धान्तिक मतभेदसे लामा फीरक्याप डीक्पा म्राङसाअी न्हाङन्हाङरी जा डीक्पा आरे । जक्की लोङतोबा, सचेत तातोबा ताम जा चु मुला । बेनानसे बेनानला क्षमतादा कदर लाबारी हाम्जी बीसाम ज्याबा ताला । चु जा एमालेला तामाङ जीम, चुजा माओवादीला तामाङ जीम, चुजा काङग्रेसग्याम हाबाला जीम बीबा ताजी बीसाम हृयाङसे प्रगति लाबारी आहाम्सेदा प्रस्ट मुला । कादे तामाङकादेसे पदरी दोबालीच्छा स्यान्दो हालाअीदा म्ही आम्हान्बा ह्रीक्पा थोबाकादे नोन् मुला । फ्युक्पो दोबाजुगुसे घमन्डीपन थोबा नोन् मुला । चुराङबा ह्रीक्पाकादेनोन् हृयाङला लागीरी, ताम्सालीङला लागीरी चुनौती हीन्ना । आहीन बीसाम हृयाङसे दात्ते कोबाह्राङबा ताम्सालीङ व्हाअीरी जे सीमित तासेला मुला । चु म्हाङजे सीमित तासेला मुला । .